SELAMAT DATANG DI KABUPATEN TABALONG

suara masyarakat daerah Tabalong utara

kabupaten Tabalong

Selasa, 14 Desember 2010

kumpulan puisi bahasa banjar

           AKU MASIH DISINI ”
               
Bila kutiring daerah sekeliling.....
Pas kamarian mahadap sanja
Matan jauh masih  kalihatan
Mahijau gunung batu kumpai di sabalah barat
Babaris gunung maratus disubalah timur.

Aku masih disini..........
Sakilan lagi matahari tinggalam
Tarus ku iringi lawan ujung mata
Tarus kurasaakan tiupan angin lawan jiwa
Asa damai ,asa longgar hinak
Bila melihat sekaliling masih hijau.

Aku masih disini.........
Masih ada kulihat sasakali binatang hutan
Masih kudangar suara-suara burung banyanyian
Nang indung menggiring anaknya
Mendatangi wadah kaguringan
Basiap sanja manyambut malam.

Aku masih disini..........
Duduk di pelataran
Menawang jauh kamuka
Sasakali kulihat abah tani bulik matan humaan
Sasakali kulihat kakanak kada babaju
Bulik mambawa sapi gaduhan.

Aku masih disini...........  
Malihat banyu sungai mulai babaya mangalir
Kulir maninggalkan wadah nang tatinggi
Mencari wadah badiam nang randah sagan kaguringan
Mangumpulkan tenaga sagan isuk
Bajalan manuju lautan

Aku masih disini...........
Malihat  humaan nang babaya manguning
Mandangar lalak mahiyau hujan basasahutan
Tarasa kulir hati meninggalkan kedudukan ini
Fikiran masih tarus menawang batambah jauh kamuka..

Aku masih disini..........................
Melihat sapida handang membawa kayu
Hasil tabangan nang sudah diulah masin jadi balok wan papan
Tibul tatakunan dalam hati ..........
Kawakah isuk aku duduk disini
Kawakah kakanakan kaina malihat hijaunya gunung
Kawakah kanakan kaina melihat kuningnya humaan
Wan kawakah malihat damainya bayu turun bagamatan.

Aku masih disini
Duduk sambil meusap banyu mata
Nang sasakali titik mambas di pipi
Manarawang nasib kakanakan kaina
Nasib banua ini kaina
Nasib alam ini kaina

Panat sudah aku disini
Kuangkat awak maninggalkan kadudukan
Masuk ka ambin rumah tarasa barat
Maninggalkan bayangan nang mengerikan........


By : locki catro............



BIARAKAN

Jauh dihulu sungai utara
Kami badiam dalam damai
Kami diam dalam kamayuan
Kami diam dalam hidup tanang

Biarkan kadiaman ini.......
Jangan diganggu
Jangan dialih
Jangan dibunguli
Jangan diakali

Kami sudah sanang
Lawan hidup kami
Bakawan lawan humaan wan kabun
Bakawan lawan binatang gaduhan
Dangsanak wan kakawanan.

Jauh disubalah hilir kami mandangar
Alam sudah rusak barataan
Gunung sudah jadi danau ganal
Padang halalang sudah hibak bangunan

Biarkan haja bagian hilir nang rusak
Cukup haja sudah itu.....
Jangan lagi dilalar ka mari
Kami takutan .......
Anak cucu kada kahagian..........


by: loki catro.


           HATI KU

Bila kulihat rupamu nang langkar.....
Bidung mancung kaya putri raja.
Alis mata kaya bulan hidup sembilan
Dikalilingi tujuh blas bintang
Bibir tipis kalihatan mahabang,...

Hatiku kadang jadi bimbang
Sama baiknya juakah hati wan rupa
Hatiku jadi tarabang malayang
Dilangkah wan guringku ikam membayang
Rasa ngalih mata dikijimakan.

Tarasa hibak langit kamarku lawan gambarmu
Rasa sasak hatiku lawan ngaranmu
Tapi aku tatap ragu lawan dirimu
Ada juakah gambarku dinding  rumahmu
Ada juakah ngaranku dibuncu hatimu....

By: loki catro.



JALAN KU


Kulangkahkan batis ini satu-satu
Gamat tapi pasti ,........
Kada jarang batis tasipak batu nang tarus maintip
Diatas tanah nang kadang balubang wan licaknya
Tapi aku tarus malangkah....

Rancak jalanku sampai disimpangan
Aku ragu........
Aku bingung.......
Jalan mana nang handak kulalui
Padahal aku masti sampai katujuan
Aku tarus malangkah.

Kada itu haja .........
Duri wan daun halalang marimbas batis
Kadang menyayat wan mancucuk sampai luka
Rabah,bangun kada tahitung sudah.
Tapi aku tarus malangkah.

Bila sampai kaina katujuan.....
Aku handak Istirahat manyanangkan kuwitan
Kaluarga wan dangsanak barataan.
Samantara biarkan aku ....
Tarus malangkah diatas jalanku saurang.


By : loki catro.

            .........O()O......0()0..........


TABAWA MATI

Bila malam sudah sampai dipanangahan.....
Mata uyuh kada kawa dikijimakan,
Bayangan ,tadi siang kamarian wan sumalam
Tarus maumpati sampai kawadah kaguringan
Maikup wan maragap hati wayah malam kasunyian

Biar batutup mata rapat-rapat.....
Kanapa jua bayangan kada mau tulak
Tarus baputar-putar
Naik turun ,kadang jauh lalu baparak pulang.

Ingatanku tarus mambayang
Meumpati kemana aku bajalan.
Bahinak sampai aku barabah di kaguringan
Kanapa ini sampai kajadian.......

Mungkinkah kajadian ini
Tabawa sampai katuha
Sampai aku kada bisa manangis
Sampai aku kada bisa maapa-apa
Dikubur ,ditimbun tanah nang menguning.....

By:loki catro

















  

3 komentar:

  1. Kak puisi yg judul ny aku masih disni... Kira2 di ijinin gak untuk dipentaskan? ��

    BalasHapus
  2. bang, minta ijin, hdk membaca akan puisi dengan judul tabawa mati

    BalasHapus