cerpen bahasa banjar.....n

* MANDAI CIWADAK*

“ bangun,....bangun dah nak ,...ari sudah subuh lakasi bangun kita bamasakan “ basubuhan suarara mama matan padu , manggarak aku hari ahad itu.padahal suara azan di langgar kada jauh matan rumah babaya tadangar katalinga,sakali-kali tadangar jua kungkuak hayam jagau ampun buhan subalah manyubalah rumah.

Asa kulir bangat aku babuncilak mata ,masih tarasa ngantuk ,”ehhhg......” sambil mangguliat  kaiyanya aku bangun jua biar mata masih kirip,sambil menyimpuni bakas kaguringan malam tadi .

“kita baulah lauk napa pang ma...? “ ujar ku sambil kukuliran bajalan manuju mama nang sudah ada di padu rumah kami.

“ tu naaa...nak dibalik higa baras  kita buka ,asa lawas jua kita kada mamakan lauk cumi-cumi kalo tanyaman liur ha “ jar sidin sambil manunjuk kahiga baras “ hari ini rencana mama handak tulak kahumaan pang ari pina barasih haja” sambung mama pulang.

            Sabujurnya cumi-cumi darat kami ini sudah diulah mama babarapa bulan dulu rahat musim ciwadak  murah, waktu itu ciwadak mudil kada baharaga basapai guguran di bawah puhunnya..nah dari pada buruk kada tamakan baik diulah mandai ,ada jua baguna sagan lauk munnya rahat handak, mana rasanya jua kada kalah nyaman lawan iwak ayam jar buhan pahuluan sini.

            Mandai ciwadak ngini nyaman banar maulahnya ,buah ciwadak dikuyak buang kulit nang batikil-tikil halus balah singkirakan lumuan wan bijinya . ambil kulitnya  sayat-sayat  sakahandak ukuran sa apa ganal tagantung kita napa kaina wadahnya ,mun wadahnya ganal haja biar kita sayat dua gin kada papa.mbah nintu kulit ciwadak nang sudah bakuyak wan pisahkan tadi kita ambil bari uyah sacukupnya buat kawadah bari sadikit banyu tutupi rapat-rapat jangan ada angin masuk ,simpan tahan babarapa bulan sampai satahun ,mun handak tinggal mambasuh lalu disanga tambahi saikit vitsin lawan bawang baririf . 

“ mangataman lih ma....? jar ku batakun sambil manuju wadah mandai diandak .

“ hi..ih kam umpatlah,barang haja ulihi saiikit barang ,balajar kabaruh ,kalo dirumah pina hawai.” Jar mama sambil mahidupi api nang kada sing nyarakan matan tadi.marga kayunya pina baal kulihan bacarian siang smalam dikabun para wadah julak.

“nggih...ulun umpat ma ai....”jar ku jua sambil mambasuh mandai  ciwadak nang dipadahkan mama iwak cumi-cumi tadi di baskom .

“ sa ini lagikah ma,”sambil ku tampaikan wan mama satangah baskom mandai  nang manguning imbah dibasuh.

“ Tambahi lagi mil ai,kaina sapalih kita bawa kabaruh nyaman dimakan baramian lawan kakawalan kaina “ mama mamadahkan “nah.... pacang rami jua lah ma, dibaruh kaina ,....” jar ku manyahuti.

Tabayang kayapa raminya kaina makanan dibaruh lawan kawanan nang ada dipahumaan pas istirahat makan siang ,nasinya panas masih bakukus lauknya cumi-cumi darat , asa kada sabar hati mahadang ari siang handak manamui makan di pahumaan lawan kakawalan kaina.

            Kada tarasa jua nasi sudah mulai madar,mandai sudah masak dua sisiruk baunya harum nyaman maulah titik liur nang manciumnya.rasanya sudah handak mamakan badahulu kaini, dalam hati aku mamandir ,saking sudah lawasnya kada makan lauk mandai ciwadak.sambil mambasuh bakas basuhan mandai tadi fikiran ku tarus baputar mambayangkan raminya kaina makanan dibaruh lawan banyak urang.

            “ Dah mil ai...mun sudah babasuh ngitu mandi haja badahulu, lalu sumbahyang biar ha mama badudi manalahkan manyanga mandainya tinggal saikit lagi kawa ai disambil maulah sambal acannya.” Jar mama mangajutikan  aku matan hayalan.

“inggih ma ai....abah tadi sudah bangunkah ma...? ” jar ku manyahuti pandir sidin .

“ nah...hi...ih bangunakan kaina sidin kasiangan kada sumbahyang subuh kaina, urang sudah turunan matan langgar.” Jar  mama panjang manyahut.

Kadada mambantah lagi aku badiri membawa baskom nang baisian piring cangkir talah di basuh tadi ka rak wadah maandak niisakan basah banyunya.

            Kada sawat tabuka lawang kamar ,abah dah tabangun manakuni “ udah turunan kah mil urang sumbahyang di langgar tadi “ jar abah batakun lawan aku.sambil turun matan ranjang masih batapihan menyilak kalambu anti malaria pambagian dinas kasihatan minggu tadi.

“ inggih bahai,....hanyar haja turunan tu masihai ada suara capal nang tapair “ jar ku manjawab tatakunan abah tadi.

Malihat sidin sudah bangun sakalian haja ku manyimpunikan bakas kaguringan sidin “ nah ikam sudahkah mandi wan sumbahyang subuh kah “ jar sidin lagi manakuni aku nang rahat basisimpun kalambu .

“ balum pang bah ai limbah basimpun ngini ulun mandi langsung sumbahyang kaina “ sahut ku, sambil maandak bantal guling diwadah nang nyaman ditiring mata.

“ umamu dimana......? “ jar sidin lagi batakun

“ adai tu dipadu, mayanga mandai sagan kaina sarapan subuh ngini, lawan sagan makanan di baruh kaina “ aku manjalaskan wan sidin rencana mama siang kaina .

            Kada tarasa talah mandi wan sumbahyang subuh ,suara ayam jagau gin udah banyanyaringan manandai  timbulnya cahaya manguning di subalah timur diatas barisan gunung maratus ,sinarnya mambanang baulur di susulapit daun-daun nang mahijau sakali-kali baguyang ditiup angin subuh nang masih dingin tapi sigar.

            “ mil ayu kita sarapan dulu ,...nyaman tulak bagawian kabaruh  mun sudah sarapan tu .” suara mama mangangajut aku rahat marasai  nyamannya suasana subuh itu dibanua saurang.

“ inggih ma.....”jarku sambil badadas bajalan manuju dapur biasa kami makanan sakaluarga rajin tu.

Mandingur bau mandai sangaan tadi masih  maulah ilat bajugit haja ,disuruh sarapan lawan mama kayapa kada sikap manunti .

“ bah makanan suah siap nich ,.....yu kita makan samaan ada lauk mandainya nah.”jarku bakiyauan mambawai abah sarapan sasamaan . maklum juapang mandai ngini tamasuk lauk katujuan kami sakaluargaan jua buhan masyarakat pahuluan sini.jadi kada usah heran bila tadangar wan tacium baunya pina titik liur.

            Kada sing suaraan sasaikung sarapan subuh ini asing-asing batambah marasa nyaman makan lauk mandai ciwadak wan sambal acan nang sudah lawas kada taudal kaluar jadi kawan panujul nasi masuk kaparut sampai limbui paluh, kapapadasan sambal acannya, tapi nyaman .

            Talah makanan kami wan mama basimpun sakalian basisiap sagan tulakan kabaruh maklum ari tarus bajalan menuju siang jadi kami musti sikap mun kada talalu saikit  kulihan gawiannya kaina, taga untungnya parut sudah taisi, kanyang pulang.......@